OTB fotosurati
Osiyo taraqqiyot banki (OTB) va O‘zbekiston hukumati respublikaga 200 million dollar miqdorida kredit ajratish to‘g‘risidagi bitimni imzoladi. Xalqaro moliya institutining press-relizida aytilishicha, ushbu mablag‘lar 60 ta podstansiyani modernizatsiya qilish va elektr tarmoqlarini boshqarishning raqamli tizimlarini joriy etishga yo‘naltiriladi.
Kredit to‘g‘risidagi bitimni Osiyo taraqqiyot banki prezidenti Masato Kanda va O‘zbekiston Bosh vaziri o‘rinbosari — Iqtisodiyot va moliya vaziri Jamshid Qo‘chqorov imzoladi. Bu OTB va Jahon bankining o‘zaro to‘liq ishonchga asoslangan hamkorlik doirasida amalga oshirilayotgan energetika sohasidagi birinchi loyihadir.
Tashabbusning dolzarbligi O‘zbekiston iqtisodiyotining o‘sishi va shaharlarining kengayishi bilan bog‘liq bo‘lib, bu energetika tizimiga tushayotgan yuklamani oshirmoqda. Resurslar yo‘qotilishini kamaytirish maqsadida podstansiyalarni rekonstruksiya qilish va modernizatsiyalash, shuningdek, «O‘zbekiston milliy elektr tarmoqlari» AJning elektr tarmoqlaridan foydalanish sohasidagi salohiyatini mustahkamlash ishlari amalga oshiriladi.
Investitsiyalar transformatorlarning ortiqcha yuklanishini kamaytirish va elektr ta’minoti ishonchliligini oshirish imkonini berishi kutilmoqda. Natijada tarmoqqa kamida 3,3 GVt quvvatga ega qayta tiklanuvchi energiya manbalarini ulash va yiliga issiqxona gazlari chiqindilarini karbonat angidrid ekvivalentida qariyb 23 ming tonnaga kamaytirish imkoniyati paydo bo‘ladi. Loyiha, shuningdek, milliy kompaniya xodimlarining malakasini oshirish, boshqaruv va moliyaviy nazorat tizimini mustahkamlashga qaratilgan.
Ushbu dastur OTBning O‘zbekiston energetika majmuasini rivojlantirish borasidagi ko‘magining davomi bo‘ladi. Bankda eslatishlaricha, 2010 yildan buyon muassasa respublika hukumatiga shunga o‘xshash tashabbuslarni amalga oshirish uchun 3,4 milliard dollardan ortiq mablag‘ ajratgan.
«Ishonchli elektr ta’minotini ta’minlash — zamonaviy iqtisodiyotning odamlar oldidagi asosiy majburiyatlaridan biridir. Ushbu bitim O‘zbekistonga talab ortib borayotgan sharoitda mazkur majburiyatni bajarishga yordam beradi. Elektr tarmoqlarini mustahkamlash xonadonlar, korxonalar va davlat muassasalarini elektr bilan ta’minlash ishonchliligini oshirish, shuningdek, qayta tiklanuvchi manbalardan ko‘proq elektr energiyasini uzatish imkonini beradi», — deydi Osiyo taraqqiyot banki prezidenti Masato Kanda.
OTB ushbu dasturning asosiy kreditori hisoblanadi. Biroq, moliyalashtirish jarayoniga Jahon banki ham qo‘shilishi ehtimoli yuqori. Joriy yilning oktyabr oyidayoq ushbu tashkilot direktorlar kengashiga O‘zbekistonga qo‘shimcha 100 million dollar ajratish to‘g‘risidagi taklif kiritiladi.
ℹ️ O‘zbekiston 1995 yilda Osiyo taraqqiyot bankining hamkoriga aylangan. 30 yillik hamkorlik davomida moliya instituti Markaziy Osiyo respublikasi hukumatiga jami 15 milliard dollar miqdorida kreditlar, grantlar va texnik yordam taqdim etgan.
