Illustrativ fotosurat Mr-Tigga/Getty Images
G‘arbiy Qozog‘iston viloyatida sud harbiy xizmatdan qochgan, Qozog‘iston chegarasini noqonuniy ravishda kesib o‘tgan va ushbu mamlakat orqali uchinchi davlatga o‘tishga uringan Rossiya fuqarosining ishini ko‘rib chiqdi. Bu haqda «Moy gorod» G‘QV sudi matbuot xizmatiga tayanib xabar berdi.
Xabarda qayd etilishicha, erkak 2025 yil iyul oyida Rossiya armiyasidagi harbiy xizmat joyini o‘zboshimchalik bilan tashlab ketgan va huquqni muhofaza qiluvchi organlardan yashirinib yurgan. 2026 yil may oyida u Qozog‘istonga o‘tishga qaror qilgan. Erkak smartfonidagi elektron xaritalar yordamida yo‘nalishni oldindan rejalashtirib, rasmiy o‘tkazish punktini chetlab o‘tgan va davlat chegarasini belgilanmagan joydan kesib o‘tgan.
U eng yaqin oradagi avtomobil yo‘liga chiqib, Uralsk shahriga, so‘ng Jambil viloyatidagi Taraz shahriga borgan. U yerdan boshqa davlatga chiqib ketmoqchi bo‘lgan. Biroq rejasini oxirigacha amalga oshira olmagan — Tarazda uni Milliy xavfsizlik qo‘mitasi xodimlari qo‘lga olgan.
Ishni Bokeyo‘rda tuman sudi ko‘rib chiqqan. Sud majlisida erkak aybini tan olgan. Uning ta’kidlashicha, chegarani noqonuniy kesib o‘tishi majburiy chora bo‘lgan. U ozodlikdan mahrum qilish jazosi tayinlamaslikni, Qozog‘istondan chiqarib yubormaslikni va amnistiya qo‘llashlarini so‘ragan.
Sud erkakni davlat chegarasini noqonuniy kesib o‘tishda aybdor deb topib, 865 ming tenge (taxminan 2 ming dollar) miqdorida jarima tayinlagan. Shuningdek, uni Qozog‘istondan chiqarib yuborish va mamlakatga besh yil muddatga kirishini taqiqlash belgilangan.
Shu bilan birga, sud Qozog‘istonning yangi Konstitutsiyasi qabul qilingani munosabati bilan 2026 yil 1 iyulda qabul qilingan amnistiya to‘g‘risidagi qonunni qo‘llab, erkakni jarima to‘lashdan to‘liq ozod qilgan. Mamlakatdan chiqarib yuborish va besh yillik kirish taqiqi esa saqlanib qolgan.
Sud hujjati qonuniy kuchga kirgan.
Ukrainada urush boshlanganidan so‘ng Qozog‘iston Rossiya armiyasida xizmat qilishni istamaydigan rossiyaliklar qo‘nim topadigan davlatlardan biriga aylandi. Ular orasida harbiy qismlarni o‘zboshimchalik bilan tark etgan harbiy xizmatchilar ham bor edi. Biroq, huquq himoyachilari Rossiyadan qochgan harbiy dezertirlar Qozog‘istonda huquqiy jihatdan zaif holatda qolayotganini ta’kidlashadi: ular qochqin maqomini olishga muvaffaq bo‘lisholmayapti, ayrimlari esa chegarani noqonuniy kesib o‘tish bilan bog‘liq jinoiy ishlar bo‘yicha ayblanuvchiga aylanmoqda.
Shuningdek, qochib o‘tganlarning qo‘lga olinib, Rossiya tomoniga topshirilgan holatlari ham ma’lum. 2022 yil oxirida Qozog‘iston Rossiya Federal qo‘riqlash xizmatining sobiq ofitseri Mixail Jilinni deportatsiya qilgan. Keyinchalik u Rossiyada qamoq jazosiga hukm qilingan. 2024 yil aprel oyida Ostonada sobiq harbiy xizmatchi Kamil Kasimov qo‘lga olingan. Huquq himoyachilarining ma’lumotlariga ko‘ra, uni Qarag‘anda viloyatining Priozersk shahridagi harbiy qismga, u yerdan esa Omskka olib ketishgan. Omskda u urush davrida dezertirlik qilgani bo‘yicha ish doirasida qattiq tartibdagi koloniyada olti yillik qamoq jazosiga hukm qilingan.
