bureau.kz sayti fotosurati
Boyqo‘ng‘irda tatu-ustasi bo‘lib ishlagan Qozog‘iston fuqarosi Roman Belov Rossiyaning Orenburg viloyatida josuslikda gumon qilinib qo‘lga olindi. Bu ma’lumotni Qozog‘iston Xalqaro inson huquqlari byurosiga (QXIHB) Qozondagi respublika Bosh konsulxonasi tasdiqladi.
Qozog‘iston diplomatlari qo‘lga olingan fuqaro bilan uchrashish uchun Rossiya hukumatiga rasmiy so‘rov yuborgan. Shuningdek, konsulxona unga tibbiy yordam ko‘rsatilishini so‘ragan. Bu talab Roman Belovning onasidan kelib tushgan murojaatga asoslangan bo‘lib, unda o‘g‘lining o‘pkasi va buyraklarida og‘riqlar borligi qayd etilgan.
Huquq himoyachilari tarqatgan xabarda aytilishicha, Qozog‘iston fuqarosi qo‘lga olinganidan so‘ng qiynoqqa solingan. Biroq, konsulxona Orenburg viloyati prokuraturasining javobini keltirgan. Unda o‘tkazilgan tekshiruv davomida «Belov R.N.ga nisbatan g‘ayriqonuniy harakatlar sodir etilgani yoki unga nisbatan zo‘ravonlik qo‘llangani haqidagi ma’lumotlar o‘z tasdig‘ini topmagani» ma’lum qilingan.
Huquq himoyachilari ma’lumotiga ko‘ra, 46 yoshli Roman Belov fitnes markazi devorlariga bezak ishlarini bajarish buyurtmasi bahonasida Orenburgga chaqirilgan. U Rossiya hududiga kelganidan so‘ng qo‘lga olingan. Tergov talqiniga ko‘ra, u go‘yoki shaxsi aniqlanmagan shaxsga maxfiy ma’lumotlarni o‘z ichiga olgan axborotni yetkazgan. Hozirda Belov Orenburg shahridagi tergov hibsxonasida saqlanmoqda.
Qo‘lga olingan shaxsning turmush o‘rtog‘i aytishicha, ayblovning asosiy dalili sifatida muayyan ma’lumotlar aks etgan jadvalning skrinshoti keltirilgan. Biroq, uning so‘zlariga ko‘ra, tergov Belov ushbu ma’lumotlarni haqiqatan ham elektron pochta, messenjerlar yoki boshqa yo‘l bilan yuborganini tasdiqlovchi hech qanday dalil taqdim etmagan.
Uning turmush o‘rtog‘i yana shuni ma’lum qilganki, Belov avvalroq Boyqo‘ng‘irda yashovchi va Ukrainada Rossiya tomonida jang harakatlarida qatnashgan bir shaxs bilan siyosiy qarashlari sababli ziddiyatga borgan. Uning aytishicha, Belov Rossiyaning Ukrainaga bostirib kirishiga qarshi bo‘lgan.
