Qozog‘iston hukumati yangidan saylangan Qurultoy — mamlakatning bir palatali parlamenti oldida o‘z vakolatlarini topshirdi. Prezident Qosim-Jomart To‘qayevning tegishli farmoni Oqo‘rda saytida e’lon qilindi.
Konstitutsiyaga muvofiq, hukumat a’zolari iste’foga chiqqanidan so‘ng Vazirlar Mahkamasining yangi tarkibi tasdiqlanguniga qadar o‘z vazifalarini bajaruvchi maqomida ishlashda davom etadi.
Birinchi bosqichda prezident Qurultoy muhokamasiga Bosh vazir lavozimiga nomzodni kiritadi. Tayinlash uchun deputatlar umumiy sonining ko‘pchilik ovozi talab etiladi. Agar parlament Bosh vazir nomzodini ikki marta rad etsa, prezident Qurultoyni tarqatib yuborish huquqiga ega.
Bosh vazir tayinlanganidan so‘ng hukumatning tuzilishi va tarkibi bo‘yicha takliflarni prezidentga taqdim etadi. Davlat rahbari Bosh vazir bilan maslahatlashuvlardan so‘ng vazirlarni tayinlaydi. Shu bilan birga, Tashqi ishlar, Mudofaa va Ichki ishlar vazirlari nomzodlarini prezident mustaqil ravishda belgilaydi.
Avvalroq To‘qayev jurnalistlarga hukumat tarkibida «ayrim o‘zgarishlar» bo‘lishini ma’lum qilgan va kadrlar o‘zgarishi «har doim muqarrar», chunki bu «hukumatga yangi kuch bag‘ishlaydi», deb ta’kidlagan.
Hukumatning iste’fosi Qurultoy — yangi Konstitutsiya qabul qilinganidan so‘ng ikki palatali parlament o‘rniga kelgan Qozog‘istonning bir palatali qonun chiqaruvchi organiga bo‘lib o‘tgan saylovlardan keyin yuz berdi. Qurultoy tarkibiga 145 nafar deputat kirdi, mandatlarning aksariyati — 110 tasini hukmron «Әdіlet» partiyasi qo‘lga kiritdi. Bugun Qurultoy o‘zining birinchi majlisini o‘tkazmoqda, unda prezident ham ishtirok etmoqda. Deputatlar qasamyod qabul qilishi, shuningdek, yangi parlament raisi saylanishi kutilmoqda.
