Gettyimages.ru © Peter Dazeley sayti fotosurati
Qozog‘istonda mobil guruhlar Rossiya bilan chegaradosh hududlarda sutka davomida patrullik qilib, yoqilg‘i-moylash materiallarini (YOMM) noqonuniy olib chiqish holatlarining oldini olish bilan shug‘ullanmoqda. Bu haqda Moliya vazirining o‘rinbosari Yerjan Birjanov yoqilg‘i bozori holatiga bag‘ishlangan hukumat yig‘ilishida ma’lum qildi.
Hukumat matbuot xizmati ma’lumotlariga ko‘ra, xavflarni boshqarish tizimi doirasida chegaraoldi yo‘llarida avtosisternalar va benzovozlar tekshirilmoqda. Faqat so‘nggi ikki sutka davomida o‘tkazish punktlarida qo‘shimcha baklar va kanistrlar orqali topilgan 61 ta yoqilg‘ini noqonuniy olib chiqishga urinish holati to‘xtatilgan. Umumiy hajm 3 tonnadan oshgan.
Bundan tashqari, davlat daromadlari organlari 62 ta yoqilg‘i quyish shoxobchasi va 22 ta kichik neft qayta ishlash zavodi faoliyatini tahlil qilmoqda. Ularda ko‘rsatilayotgan xizmat hajmida anomal o‘sish qayd etilgan.
Qozog‘iston Ichki ishlar vaziri Yerjan Sadenov ma’lum qilishicha, chegara hududlarida nazorat kuchaytirilgan va chuqur tekshiruvlar o‘tkazishga jalb etilgan xodimlar soni oshirilgan.
Avvalroq Energetika vazirligi benzin eksportini taqiqlashni yana olti oyga — 2026 yil noyabrdan 2027 yil mayigacha uzaytirish bo‘yicha buyruq loyihasini tayyorlagan edi. Ushbu cheklovlar barcha davlatlarga, shu jumladan Yevroosiyo iqtisodiy ittifoqi mamlakatlariga ham tatbiq etiladi.
Hukumat shuningdek ichki bozorni yoqilg‘i bilan ta’minlash ustuvor vazifa ekanini ta’kidladi. Benzinni olib chiqish faqat transport vositalarining standart yoqilg‘i baklari doirasida ruxsat etilgan.
Yoqilg‘i chiqarish ustidan nazorat kuchaytirilgani haqidagi xabarlar OAVda Rossiyadan “benzin turizmi” ortib borayotgani to‘g‘risidagi materiallar fonida paydo bo‘ldi. Yoqilg‘i narxlaridagi saqlanib qolgan farq sababli Qozog‘istonning chegaraoldi hududlarida Rossiya raqamli avtomobillar oqimi keskin oshgani qayd etilmoqda.
Ijtimoiy tarmoqlar monitoringi va rossiyalik avto bloger Aleksey Yepishenko materiallariga ko‘ra, Qozog‘istonning G‘arbiy Qozog‘iston viloyatidagi AYOQSHlarda, ayniqsa Uralsk shahrida, Samara, Saratov va Orenburg viloyatlaridan kelgan haydovchilar soni sezilarli darajada oshgan. Ular nisbatan arzonroq bo‘lgan Qozog‘iston benzinini xarid qilish uchun kelishmoqda. Ma’lum qilinishicha, avtomobilni to‘liq yoqilg‘i bilan to‘ldirishda qilingan tejamkorlik Qozog‘istonga borish va qaytish xarajatlarini to‘liq qoplashi mumkin.
Bu holatga 2026 yil yozida Qozog‘iston va Rossiyada benzin narxlari o‘rtasidagi farqning o‘sishi hamda Rossiyaning ayrim hududlarida yoqilg‘i ta’minotidagi uzilishlar sabab bo‘lgani aytilmoqda
