Qozog‘iston — Farer orollari uchrashuvidan lavha. QFF fotosurati sun’iy intellekt yordamida qayta ishlandi
Qozog‘iston futbol terma jamoasi UYEFA Millatlar ligasining to‘rtinchi turida Farer orollari terma jamoasi bilan durang o‘ynadi — 2:2. Uchrashuv 6 oktyabr kuni Ostonada bo‘lib o‘tdi.
Qozog‘istonliklar so‘nggi 11 oy ichida uchinchi marta farerliklarni mag‘lub eta olmadi. 2025 yil noyabr oyida jamoalar o‘rtoqlik uchrashuvida to‘qnash kelgan va unda Farer orollari 1:0 hisobida g‘alaba qozongan. Joriy Millatlar ligasining birinchi davrasida, 26 sentyabr kuni raqiblar 1:1 hisobida durang o‘ynagan. Shu tariqa, Qozog‘iston Farer orollari ustidan 2013 yil sentyabridan beri g‘alaba qozona olmayapti.
Ostonada mehmonlar 22-daqiqada hisobni ochdi — Petur Knudsen gol urdi. 63-daqiqada Geza David Turi Farer orollarining ustunligini ikki to‘pga yetkazdi.
Ikki daqiqadan so‘ng mehmonlar bir kishiga kam bo‘ldi: Martin Agnarsson ikkinchi sariq kartochkasini oldi. Qozog‘iston son jihatidan ustunlikdan foydalandi. 68-daqiqada Sergey Maliy hisobdagi farqni qisqartirdi, yana sakkiz daqiqadan so‘ng Nurali Alip Maksim Samorodovning uzatmasidan keyin hisobni tenglashtirdi. Uchrashuv oxirida jamoalar yana teng tarkibda qoldi — 85-daqiqada Maliy to‘g‘ridan to‘g‘ri qizil kartochka oldi.
36 yoshli Maliy uchun mazkur uchrashuv rekordli bo‘ldi. Himoyachi milliy terma jamoa safidagi 77-o‘yinini o‘tkazib, hisobida 76 ta uchrashuv bo‘lgan Samat Smaqovdan o‘zib ketdi.
Farer orollariga qarshi 36 yosh va to‘rt oyligida gol urgan Maliy, shuningdek, UYEFA turnirlarida Qozog‘iston terma jamoasi safida gol urgan eng katta yoshdagi futbolchiga aylandi.
Terma jamoaning barcha o‘yinlarini hisobga olgandagi mutlaq yosh rekordi Baxtiyor Bayseitovga tegishli: 1992 yil iyul oyida Qozog‘iston terma jamoasida o‘ynayotgan bosh murabbiy Liviya darvozasiga 39 yoshida gol urgandi.
Guruhdagi parallel uchrashuvda Slovakiya mehmonda Moldoviyani 4:0 hisobida yirik hisobda mag‘lub etdi. To‘rt turdan so‘ng slovaklar 10 ochko jamg‘arib, ishonchli tarzda peshqadamlik qilmoqda. Farer orollari va Moldoviya hisobida to‘rt ochkodan, Qozog‘istonda esa ikki ochko bor.
Guruh bosqichi yakunlanishiga ikki tur qolgan bir paytda Qozog‘iston birinchi o‘rinni egallash imkoniyatini boy berdi: hatto ikki g‘alaba ham Jon van 't Sxip shogirdlariga ko‘pi bilan 8 ochko to‘plash imkonini beradi. Shu bilan birga, qozog‘istonliklar hali ham ikkinchi o‘rin uchun kurashishi mumkin. Guruh g‘olibi to‘g‘ridan to‘g‘ri B ligasiga ko‘tariladi, ikkinchi o‘rinni egallagan jamoa esa B ligasi vakillaridan biriga qarshi o‘tish uchrashuvlarida ishtirok etadi.
Qozog‘iston qolgan uchrashuvlarni noyabr oyida o‘tkazadi: 13 noyabr kuni jamoa mehmonda Moldoviya bilan o‘ynaydi, 16 noyabr kuni esa Slovakiyani qabul qiladi.
