Kutilganidan past, ammo belgilanganidan yuqori

SI tasviri

Yaponiyada bo‘lib o‘tgan XX yozgi Osiyo o‘yinlari yakunlandi. Markaziy Osiyoning besh davlati sportchilari mintaqa uchun rekord ko‘rsatkich — 186 ta medalni qo‘lga kiritishdi. Medallar soni bo‘yicha rekord qayd etilgan bo‘lsa-da, sifat jihatidan bunday bo‘lmadi. Bu gal Markaziy Osiyo terma jamoalari jami 36 ta oltin medal oldi. Holbuki, Xanchjoudagi avvalgi Osiyo o‘yinlarida rekord darajadagi 180 ta medalning 38 tasi oltin bo‘lgandi. 1994 yilda qo‘lga kiritilgan 39 ta oltin medal esa hozircha erishib bo‘lmas natija bo‘lib turibdi.

Shunga qaramay, umumiy statistika ortida avvalgi Osiyo o‘yinlariga nisbatan bir qator qiziqarli natijalar bor. Chunki aynan shu natijalar medallar bo‘yicha reja tuzishda asosiy mezon sifatida olingan edi. Masalan, Qozog‘iston medallar sonini to‘rttaga oshirib, 11-o‘rindan 8-o‘ringa ko‘tarildi. Biroq, terma jamoa o‘zining 99 ta medaldan iborat rejasini bajara olmadi. O‘zbekiston Xanchjoudagi rekord natijasini deyarli takrorladi va ketma-ket ikkinchi marta qit’aning eng kuchli beshta terma jamoasi qatoriga kirdi. Buning ustiga, O‘zbekiston Yaponiyaga o‘z tarixidagi eng katta tarkib bilan borgan va avvalgi natijasini yaxshilashni maqsad qilgan edi. Tojikiston medallar jamg‘armasini ikki baravardan ziyod oshirdi. Qirg‘iziston esa to‘rtta oltin medalidan uchtasini yo‘qotdi. Turkmaniston esa rejalashtirilgan yettita medal o‘rniga ikkita medal bilan cheklandi.

O‘yinlar oldidan «Farg‘ona» mintaqadagi beshta terma jamoaning imkoniyatlarini baholagan edi. Qozog‘istonning asosiy umidlari orasida dzyudo bo‘yicha Olimpiada chempioni Yeldos Smetov, Olimpiada kumush medali sovrindori, gimnast Nariman Qurbonov, kuchli bokschilar jamoasi, merganlar va qilichbozlar bor edi. O‘zbekiston, avvalo, boks, kurash, og‘ir atletika, taekvondo, qilichbozlik va dzyudoga umid bog‘ladi. Qirg‘iziston deyarli Olimpiada tarkibidagi kurashchilar jamoasini hamda Parij Olimpiadasi kumush medali sovrindori, bokcchi Munarbek Seyitbek uuluni olib keldi. Tojikistondan esa bir yo‘la ikki dzyudochi jahon reytingida yuqori o‘rinlarni egallab turgan edi. Turkmaniston esa asosiy umidlarini og‘ir atletika va yakkakurash turlariga bog‘ladi.

Bu rejalarning ayrimlari o‘zini oqladi. Ba’zilari esa umuman amalga oshmadi. Markaziy Osiyoning bir qator muhim medallarini esa musobaqalar boshlanishidan oldin deyarli e’tibor markazida bo‘lmagan sportchilar, hatto sport turlari qo‘lga kiritdi.

O‘zbekiston: natijalar deyarli o‘sha, ammo Osiyo o‘yinlari butunlay boshqacha bo‘ldi

2026 yil: 5-o‘rin — 21 ta oltin, 25 ta kumush, 24 ta bronza (jami 70 ta)

2023 yil: 5-o‘rin — 22 ta oltin, 18 ta kumush, 31 ta bronza (jami 71 ta)

O‘zbekiston Yaponiyaga o‘z tarixidagi eng katta tarkib bilan — 42 ta sport turida 396 nafar sportchi bilan bordi. Xanchjoudagi rekord natija — 71 ta medal va terma jamoaning Osiyo o‘yinlarini ilk bor beshinchi o‘rinda yakunlaganidan so‘ng, yangi rekord o‘rnatish mantiqiy vazifa bo‘lib ko‘ringan edi. Ammo bu natijaga erishilmadi: umumiy medallar soni bir donaga, oltin medallar soni ham bir donaga kamaydi. Shu bilan birga, terma jamoa yana beshinchi o‘rinni egalladi va so‘nggi kunga qadar hatto to‘rtinchi o‘rin uchun ham da’vo qildi. Biroq, yakunda Hindiston oldinga chiqdi.

Shoxsanoam Sherzodova. MOQ fotosurati

O‘zbekiston natijasining asosiy xususiyati — sovrindorlar safidan joy olgan sport turlarining nihoyatda keng qamrovli bo‘lganidir. Vladimir Svechnikov 10 metr masofadan pnevmatik to‘pponcha bilan otishda Osiyo o‘yinlari rekordini yangilab, g‘olib bo‘ldi va mamlakatga 32 yildan so‘ng o‘q otish sportidagi ilk oltin medalni olib keldi. O‘tkirbek Jo‘rayev sport gimnastikasida ot ustida bajariladigan mashqda, Shoxsanam Sherzodova 200 metr masofaga yakka kanoeda eshkak eshishda, Shahzod Nurmatov va Sobirjon Safaroliyev akademik eshkak eshishda g‘oliblikni qo‘lga kiritdi. Sharifa Davronova uch xatlab sakrashda chempionlik unvonini himoya qildi, Taxmina Ikromova badiiy gimnastikada g‘olib bo‘ldi, Akbar Jo‘rayev esa 110 kilogrammgacha bo‘lgan vazn toifasida og‘ir atletikada Osiyo o‘yinlari rekordi bilan oltin medal oldi.

Kutilmagan tarixiy natija kibersportda ham qayd etildi. Abubakr Iminjonov va Farruh Mirhamidov eFootball bo‘yicha bronza medalini qo‘lga kiritdi. Bu O‘zbekiston va umuman Markaziy Osiyoning Osiyo o‘yinlari tarixida kibersportdagi birinchi rasmiy medali bo‘ldi.

2018 yilda mazkur sport turi Osiyo o‘yinlarida faqat namoyish dasturi maqomida ishtirok etgan bo‘lsa, Xanchjou-2023da u to‘liq medallar uchun o‘ynaladigan sport turiga aylandi.

Boshqa tomondan, an’anaviy ravishda kuchli bo‘lgan ayrim yo‘nalishlar kutilganidan kamroq natija ko‘rsatdi. O‘yinlar oldidan taekvondoga alohida umidlar bog‘langan edi: bahorda O‘zbekiston terma jamoasi Osiyo chempionatida 11 ta medalni qo‘lga kiritgan, qit’a chempioni Ozoda Sobirjonova va President's Cup g‘olibi Jasurbek Jaysunov esa terma jamoa tarkibiga kiritilgan edi. Qilichbozlikda ham katta imkoniyatlar bor deb baholangandi. Ayollar qilichbozlik jamoasi Xanchjoudagi sensatsion oltin medalni himoya qilishi kerak edi. Yaponiyaga chempionlik tarkibining uch a’zosi — Zaynab Dayibekova, Guliston Perdebayeva va Fernanda Errera ham borgan edi. Biroq, o‘sha muvaffaqiyatni takrorlashning iloji bo‘lmadi.

Abdumalik Xaloqov. UzDaily fotosurati

Boks ham mutlaq triumf bilan yakunlanmadi. Parij Olimpiadasidan so‘ng, unda o‘zbekistonlik erkak bokschilar ustunlik qilganini hisobga olsak, terma jamoadan qit’ada birinchi o‘rinni kutish mumkin edi. Yaponiyada Abdumalik Xoloqov va To‘rabek Habibullayev chempion bo‘ldi, yana besh nafar bokschi kumush va bronza medallarini qo‘lga kiritdi. Biroq, medallar hisobi bo‘yicha uchta oltin medal olgan Hindiston g‘olib chiqdi. Xoloqov Olimpiada chempioni maqomini tasdiqladi, Habibullayev esa oltin medalga borish yo‘lida chorak finalda Qozog‘istonlik Olimpiada kumush medali sovrindori Nurbek Oralbayni mag‘lub etdi. Biroq, o‘zbek boksi uchun Osiyo raqiblari uchun mezbon bo‘lgan qit’a chempionatida ikkita chempionlik unvoni — ko‘proq oddiy, ishchi natija bo‘ldi, deyish mumkin.

Dzyudoda esa vaziyat aksincha bo‘ldi. Bu yo‘nalishda O‘zbekiston aksariyat qo‘shnilaridan yaxshiroq natija ko‘rsatdi: Sita Qadamboyeva va Muzaffarbek Turaboyev chempion bo‘ldi, yana bir necha sportchi sovrindorlar qatoridan joy oldi. Turaboyev ketma-ket ikkinchi Osiyo o‘yinlarida g‘olib chiqdi.

Alohida e’tiborni jamoaviy sport turlari tortdi. Erkaklar futbol terma jamoasi Xanchjouda bronza medalini qo‘lga kiritgan edi, shuning uchun kamida shu natijani takrorlash real vazifa bo‘lib ko‘ringandi. Ammo Yaponiyada Ravshan Haydarov shogirdlari guruhda g‘olib chiqdi, yarim finalga yetib bordi va finalga chiqishga juda yaqin keldi. O‘zbekiston Yaponiya ustidan hisobda oldinda borayotgan edi, ammo javob golini o‘tkazib yubordi. Asosiy va qo‘shimcha vaqt 1:1 hisobida yakunlanganidan so‘ng, nihoyatda uzoq davom etgan penaltilar seriyasida — 8:9 hisobida mag‘lub bo‘ldi. Uchinchi o‘rin uchun bahs yanada alamli kechdi: o‘zbekistonliklar Xitoyga qarshi ikki marta hisobni tenglashtirdi, ikkinchi golni hatto 90-daqiqada urdi. Ammo yana penaltilar seriyasida, bu safar 3:4 hisobida yutqazdi. Natijada ketma-ket ikkinchi futbol medali o‘rniga — to‘rtinchi o‘rin.

O‘zbekiston ayollar terma jamoasi ham futbol turnirida ishtirok etdi, ammo medallarga yetib bora olmadi. Erkaklar voleybol terma jamoasi Yaponiya, Pokiston va Qozog‘iston bilan bir guruhdan joy oldi va uchala uchrashuvda ham mag‘lub bo‘ldi. Jumladan, qo‘shni Qozog‘istonga qarshi bahsda 1:3 hisobida yutqazdi. Basketbol va boshqa yirik jamoaviy sport turlarida esa Markaziy Osiyo vakillari umuman sovrindorlar safidan ancha uzoqda qoldi.

Qozog‘iston: o‘sish bor, ammo reja bajarilmadi

2026 yil: 8-o‘rin — 12 ta oltin, 24 ta kumush, 48 ta bronza (jami 84 ta)

2023 yil: 11-o‘rin — 10 ta oltin, 22 ta kumush, 48 ta bronza (jami 80 ta)

Qozog‘iston musobaqa oldidan qo‘shnilariga qaraganda aniqroq vazifa belgilagan edi. Turizm va sport vazirligi 99 ta medal olish maqsadini qo‘ygandi. Xanchjoudagi 80 ta medal, shu jumladan atigi 10 ta oltin medaldan so‘ng, birinchi navbatda terma jamoani Osiyoning kuchli o‘ntaligiga qaytarish talab etilardi. Qozog‘iston vazifaning ikkinchi qismini bajardi: 12 ta oltin medal va 8-o‘rin — yaqqol olg‘a siljishdir. Biroq medallar rejasigacha 15 ta medal yetmay qoldi.

Shu bilan birga, Qozog‘iston umumiy medallar hisobi doirasidan tashqarida ham muhim bo‘lgan bir qator g‘alabalarni qo‘lga kiritdi. Vladislav Yakovlev va Ivan Chernuxin rulsiz erkaklar juftligida g‘olib chiqib, akademik eshkak eshish bo‘yicha Qozog‘istonga Osiyo o‘yinlaridagi ilk oltin medalni olib keldi. Tamirlan Tleules mamlakatga taekvondo bo‘yicha O‘yinlardagi ilk chempionlik unvonini taqdim etdi. Ruslan Qurbonov, Kirill Proxodov, Yerlik Sertay va Vadim Sharlaimovdan iborat erkaklar shpaga jamoasi esa Qozog‘istonga jamoaviy shpagadagi oltin medalni 24 yildan so‘ng qaytardi.

E’tiborlisi, bu natija ular shu mavsumning o‘zida Osiyo va jahon chempionatlarida g‘alaba qozonganidan keyin qayd etildi.

Tamirlan Tleules. Ijtimoiy tarmoqdagi fotosurat

Aleksey Lutsenko yana Osiyo velosporti uchun o‘ziga xos bo‘lgan maqomini tasdiqladi: u ham guruh poygasida, ham alohida start bilan o‘tkaziladigan individual poygada g‘olib bo‘ldi. Alohida startli poygada qozog‘istonlik sportchi ketma-ket to‘rtinchi marta Osiyo o‘yinlari chempioni bo‘ldi. Bokcda Torexan Sabirxan va Aybek Oralbay ikki nafar oltin medalni qo‘lga kiritib, Osiyo o‘yinlarida qozog‘istonlik chempionlarsiz davom etib kelayotgan uzoq seriyaga chek qo‘ydi.

Biroq, aynan musobaqalar boshlanishidan oldin ko‘proq narsa kutilayotgan sportchilar orasida Qozog‘iston bir qator ehtimoliy oltin medallarni qo‘ldan boy berdi. Olimpiada chempioni Yeldos Smetov 60 kilogrammgacha bo‘lgan vazn toifasida finalgacha yetib bordi, ammo hal qiluvchi bahsda yaponiyalik Xayato Kondoga mag‘lub bo‘ldi. Umuman, qozog‘istonlik dzyudochilar yettita medal, jumladan, aralash jamoa tarkibida kumush medalini qo‘lga kiritdi, ammo birorta ham oltin medal ololmadi. Individual bahslardagi to‘rtta finalning barchasi ham mag‘lubiyat bilan yakunlandi. Olimpiada chempioni boshchiligidagi terma jamoa uchun bu sezilarli darajada boy berilgan imkoniyatdir.

Gimnast Nariman Qurbonovga bildirilgan umidlar ham o‘zini oqlamadi. Parij Olimpiadasi kumush medali sovrindori ot ustida bajariladigan mashqda medalning asosiy da’vogarlaridan biri hisoblangan edi. Ammo u hatto o‘zining asosiy dasturida finalga chiqa olmadi. Qozog‘iston sport gimnastikasida bir nechta final yo‘llanmalarini qo‘lga kiritdi, biroq terma jamoaning eng ko‘p unvonga ega sportchilaridan biri shaxsiy medal uchun kurashish imkoniyatisiz qoldi.

Aybek Oralbay. Qazsport fotosurati

Boks ham ziddiyatli natija bilan yakunlandi. Torexan Sabirxan va Aybek Oralbay chempion bo‘ldi, ammo Parij Olimpiadasi kumush medali sovrindori va 2026 yil Osiyo chempioni Nurbek Oralbay chorak finalning o‘zida To‘rabek Habibullayevga mag‘lub bo‘ldi. O‘yinlar oldidan 55 kilogrammgacha bo‘lgan vazn toifasining asosiy favoritlaridan biri sifatida tilga olingan Mahmud Sabirxan turnirni bronza medal bilan yakunladi. Nazim Qizaybay esa 1/8 finaldayoq musobaqani tark etdi. Umuman olganda, natija yaxshi bo‘ldi, ammo eng ko‘p e’tirof etilgan bir nechta yetakchi sportchilar sovrindorlar safidan joy ola olmadi.

Janjal ham yuz berdi. Yengil atletikada Yasmina Toksanbayeva marafon masofasida sportcha yurish bahsida birinchi bo‘lib marraga yetdi va eng yaqin raqibasidan qariyb to‘rt daqiqa oldin keldi. Biroq, marradan so‘ng qozog‘istonlik sportchi World Athletics talablariga javob bermagan poyabzaldan foydalangani sababli diskvalifikatsiya qilindi. Mamlakat uchun juda muhim bo‘lgan yana bir oltin medal shu tariqa boy berildi.

Jamoaviy sport turlarida Qozog‘iston Osiyo medallari uchun muntazam da’vo qilgan davrlaridan ancha uzoqda qoldi. Erkaklar basketbol terma jamoasi guruh bosqichidagi uchala uchrashuvda ham — Xitoy, Filippin va Bahraynga qarshi — mag‘lub bo‘ldi. Ayollar jamoasi Filippinga qarshi mag‘lubiyat bilan boshladi, keyin Yaponiyadan yirik hisobda — 23:88 hisobida yutqazdi va faqat so‘nggi uchrashuvda Gonkong ustidan g‘alaba qozondi.

Voleybolda erkaklar O‘zbekiston va Gonkongni mag‘lub etdi, ammo Pokiston va Yaponiyaga qarshi uchrashuvlardagi mag‘lubiyatlar ularni medallar uchun kurashdan chetda qoldirdi. Ayollar jamoasi chorak finalgacha yetib bordi va u yerda Janubiy Koreyaga 0:3 hisobida yutqazdi. Keyin 5–8-o‘rinlar uchun bahslarda ham mag‘lub bo‘lib, turnirni sakkizinchi o‘rinda yakunladi.

Qirg‘iziston: yulduzlar keldi, bitta oltin qo‘lga kiritildi

2026 yil: 26-o‘rin — 1 ta oltin, 3 ta kumush, 10 ta bronza (jami 14 ta)

2023 yil: 18-o‘rin — 4 ta oltin, 2 ta kumush, 9 ta bronza (jami 15 ta)

Faqat umumiy medallar soniga qaralsa, Qirg‘iziston Xanchjoudagi natijasini deyarli takrorladi: 15 ta o‘rniga 14 ta medal. Ammo oltin medallar soni to‘rt baravarga kamaydi. Bu esa terma jamoa ishtirokini oddiy «bitta medal kam» degan ta’rifdan ko‘ra ancha aniqroq ifodalaydi.

Jolaman Sharshenbek. Ijtimoiy tarmoqdagi fotosurat

Osiyo o‘yinlari oldidan kurashchilar tarkibi mamlakat tarixidagi eng kuchli tarkiblardan biri sifatida baholangan edi. Jolaman Sharshenbekov, Akjol Mahmudov, Meerim Jumanazarova va Ayperi Medet qizi — to‘rtala sportchining ham Olimpiada yoki jahon chempionatlarida qo‘lga kiritgan medallari bor edi. Mahmudov va Jumanazarova bahorda Osiyo chempionatida g‘olib bo‘ldi. Dzyudoda Xanchjoudagi chempionlik unvonini Erlan Sherov himoya qilishi kerak edi. Boksda esa asosiy umid Olimpiada kumush medali sovrindori Munarbek Seyitbek uulu edi.

Bu sportchilar orasidan faqat Sharshenbekov chempion bo‘ldi. U 60 kilogrammgacha bo‘lgan yunon-rum kurashi finalida o‘zbekistonlik Alisher G‘aniyevni 7:5 hisobida mag‘lub etdi. Mahmudov, Jumanazarova va Medet qizi bronza medallarini qo‘lga kiritdi. Natijada kurash yana Qirg‘izistonning eng salmoqli natijalarining asosiy qismini ta’minladi, ammo Xanchjoudagi oltin medallar hosilini takrorlay olmadi.

Ayniqsa, boksdagi natija alamli bo‘ldi. Olimpiada kumush medalidan so‘ng Seyitbek uuludan kamida sovrindorlar safidan joy olish kutilgan edi. Ammo qirg‘izistonlik bokschi 1/8 finalning o‘zidayoq tojikistonlik Akmal Ubaydovga 0:3 hisobida mag‘lub bo‘ldi. Ubaydov yakunda bronza medalgacha yetib bordi, ammo Qirg‘iziston delegatsiyasining asosiy sportchilaridan biri uchun turnir medallar uchun bahslar boshlanishidan ancha oldin yakunlandi.

Shu fondagina qirg‘izistonliklarning eng qimmatli medallaridan biri kutilmagan sport turidan keldi. Denis Petrashov 200 metrga brass usulida suzishda milliy rekord — 2 daqiqa 08,67 soniya natija bilan ikkinchi o‘rinni egalladi. G‘olib bo‘lgan yaponiyalik Sin Oxasi esa aynan shu finalda jahon rekordini — 2:04,83 natijani qayd etdi.

Xalqaro maydondagi eng yirik yutuqlarining deyarli barchasi yakkakurash sport turlari bilan bog‘liq bo‘lgan mamlakat uchun suzishning Olimpiada dasturiga kiruvchi turidagi kumush medal butun Osiyo o‘yinlarining eng muhim natijalaridan biriga aylandi.

Denis Petrashov. Ijtimoiy tarmoqdagi fotosurat

Qirg‘iziston Osiyo o‘yinlarida ilk bor dasturga kiritilgan MMA bo‘yicha yana uchta bronza medalni qo‘lga kiritdi. Ammo jamoaviy sport turlari deyarli quvonch keltirmadi. Erkaklar futbol terma jamoasi Yaponiya, Tailand va Gonkong bilan bir guruhdan joy oldi. O‘yinlarning rasmiy ochilishidan oldinyoq qirg‘izistonliklar Tailandga 2:3 hisobida mag‘lub bo‘ldi, Yaponiyaga qarshi uchrashuv esa 0:7 hisobidagi yirik mag‘lubiyat bilan yakunlandi. Erkaklar voleybolida ham jamoa hal qiluvchi bosqichlardan uzoqda qoldi: Eron, Indoneziya va Tailandga qarshi uchrashuvlarning barchasida quruq hisobda mag‘lub bo‘ldi.

Tojikiston: favoritlar omadsizligi oltin olishi kutilmagan sportchilar hisobiga qoplandi

2026 yil: 22-o‘rin — 2 ta oltin, 5 ta kumush, 9 ta bronza (jami 16 ta)

2023 yil: 24-o‘rin — 2 ta oltin, 1 ta kumush, 4 ta bronza (jami 7 ta)

Mintaqaning beshta davlati orasida avvalgi Osiyo o‘yinlariga nisbatan eng katta o‘sishni Tojikiston namoyish etdi. Medallar soni 7 tadan 16 taga yetdi — ya’ni ikki baravardan ham ko‘proq oshdi. Shu bilan birga, oltin medallar soni o‘zgarmadi. Eng muhimi esa, ularni Osiyo o‘yinlari oldidan asosiy umidlar bog‘langan sportchilar emas, mutlaqo boshqa sportchilar qo‘lga kiritdi.

Asosiy umid dzyudoga tikilgan edi. Muhiddin Asadulloyev Yaponiyaga 73 kilogrammgacha bo‘lgan vazn toifasida jahon reytingida birinchi raqam sifatida kelgan, Nurali Emomali esa 66 kilogrammgacha bo‘lgan vaznda dunyoda ikkinchi o‘rinda turgan edi. Ikkalasi ham bahorda Osiyo chempionatida g‘olib bo‘lgan va Dushanbe shahridagi uy Grand Slam musobaqasida ham chempionlikni qo‘lga kiritgan edi. Bunday vaziyatda kamida bitta oltin medal kutish to‘liq asosli edi.

Ammo bu umid amalga oshmadi. Asadulloyev bronza medal bilan cheklandi. Emomali chorak finalda mo‘g‘ul sportchisi Yolqu Qozirbekka mag‘lub bo‘ldi, keyin tasalli bahsida Bahrayn vakili Suhrob Boqiyevga yutqazib, faqat yettinchi o‘rinni egalladi. Jahon reytingida ikkinchi o‘rinda turgan va amaldagi Osiyo chempioni uchun bu Markaziy Osiyo delegatsiyasining butun musobaqadagi eng katta shaxsiy omadsizliklaridan biri bo‘ldi.

Shu bilan birga, Tojikiston dzyudosi medalsiz qolmadi. Asadulloyev, Abubakr Sherov va Ahliya Muminova bronza medallarini qo‘lga kiritdi, Jahongir Majidov esa 100 kilogrammgacha bo‘lgan vazn toifasida finalgacha yetib bordi. Natijada to‘rtta medal qo‘lga kiritildi, ammo ular orasida birorta ham oltin medal bo‘lmadi.

Otabek Rajabov. Ijtimoiy tarmoqdagi fotosurat

Ammo dasturga yangi kiritilgan sport turi kutilmaganda juda yaxshi natija berdi. MMA ilk bor Osiyo o‘yinlari dasturiga kiritildi va Tojikiston darhol medallar hisobi bo‘yicha birinchi o‘rinni egalladi. Mirzobek Umarov 60 kilogrammgacha bo‘lgan vazn toifasida chempion bo‘ldi, Otabek Rajabov 65 kilogrammgacha bo‘lgan vaznda oltin medal oldi, Behruz Xurshedzoda esa kumush medalni qo‘lga kiritdi. Tojikistonning Osiyo o‘yinlaridagi ikki oltin medalining ikkalasi ham aynan shu sport turidan keldi.

Kutashilgan natija kurashda ham qayd etildi. Shakarmamad Mirmamadov va Yosin Bobokalonov finalgacha yetib bordi, ammo ikkalasi ham oltin medalga bir qadam qolganda to‘xtadi. Boksda Akmal Ubaydov va Parviz Karimov bronza medallarini qo‘lga kiritdi. Ubaydov musobaqa davomida Qirg‘izistonning Olimpiada kumush medali sovrindori Munarbek Seyitbek uuluni ham mag‘lub etdi.

Erkin kurashda Abdulmajid Qudiyev uchinchi oltin medalga yanada yaqin keldi. 65 kilogrammgacha bo‘lgan vazn toifasi finalida u hindistonlik Sudjit ustidan 9:2 hisobida oldinda borayotgan edi. Ammo ustunligini saqlab qola olmadi va 9:10 hisobida mag‘lub bo‘ldi. Bu bellashuv nafaqat sportchining shaxsiy natijasini, balki Tojikistonning Osiyo o‘yinlaridagi ishtirokiga berilgan umumiy bahoni ham o‘zgartirishi mumkin edi.

Shunga qaramay, uchinchi oltin medalsiz ham 16 ta medal — yettita medalga nisbatan ulkan o‘sishdir. Eng muhimi, Tojikiston dzyudoda chempionlikka eng aniq da’vogar bo‘lgan ikki sportchisi oltin medal qo‘lga kirita olmagan sharoitda ham bunday natijaga erishdi. Ehtimol, bu taraqqiyotning asosiy belgisidir: natija endi bir-ikkita yetakchi sportchiga bog‘liq bo‘lib qolmadi.

Turkmaniston: Rustamovaga bildirilgan umidlar o‘zini oqlamadi, ammo og‘ir atletikachilar turnirni qutqardi

2026 yil: 31-o‘rin — 0 ta oltin, 2 ta kumush, 0 ta bronza (jami 2 ta)

2023 yil: 29-o‘rin — 0 ta oltin, 1 ta kumush, 6 ta bronza (jami 7 ta)

Turkmaniston Markaziy Osiyo davlatlari orasida eng kam sonli delegatsiya bilan ishtirok etdi — sakkizta sport turida atigi 34 nafar sportchi. Shuning uchun o‘nlab medallar kutish qiyin edi. Asosiy umidlar og‘ir atletika, kurash, boks va karatega bog‘langan.

Musobaqalar oldidan eng katta qiziqishni 20 yoshli Anamjan Rustamova uyg‘otgan edi. U may oyida o‘smirlar o‘rtasidagi jahon chempionatida ikki karra g‘olib bo‘lgan, 257 kilogramm natija qayd etib, kuchli xitoylik Syuy Lin’yuedan o‘zib ketgan edi. Aynan Rustamova 2014 yildan beri Turkmanistonga yozgi Osiyo o‘yinlaridagi ilk oltin medalni olib kelishi mumkin bo‘lgan sportchi sifatida ko‘rilgandi.

Biroq, u sovrindorlar safidan joy olish uchun atigi bir kilogramm yetmay qoldi. 86 kilogrammgacha bo‘lgan vazn toifasida Rustamova 258 kilogramm natija qayd etib, to‘rtinchi o‘rinni egalladi va Eronlik bronza medali sovrindoridan minimal farq bilan ortda qoldi. Yana bir og‘ir atletikachi Bektimur Reyimov musobaqani beshinchi o‘rinda yakunladi.

Shaxzodbek Matyaqubov . Ijtimoiy tarmoqdagi fotosurat

Biroq, Turkmaniston og‘ir atletikadan baribir medal oldi — uni Shahzodbek Matyaqubov qo‘lga kiritdi. 110 kilogrammgacha bo‘lgan vazn toifasida u 410 kilogramm natija qayd etib, ikkinchi o‘rinni egalladi. Bunda turkmanistonlik sportchi 405 kilogramm natija ko‘rsatgan xitoylik Olimpiada chempioni Lyu Xuanxuadan ham o‘zib ketdi. 423 kilogramm natija bilan O‘zbekistondan Akbar Jo‘rayev g‘olib bo‘ldi.

Ikkinchi kumush medalni karatechi Davut Nazmiradov 75 kilogrammgacha bo‘lgan vazn toifasida qo‘lga kiritdi. Ammo shu bilan Turkmanistonning medallar tarixi yakunlandi. Medallarga umid qilingan bokschilar va kurashchilar ham sovrindorlar safidan joy ola olmadi.

Yakuniy natija — Xanchjoudagi yettita medalga nisbatan bu safar ikkita medal. Delegatsiya kichik bo‘lganini hisobga olganda ham, bu Markaziy Osiyo davlatlari orasidagi eng salbiy dinamika bo‘ldi. Taassurotni biroz o‘zgartiradigan jihat — Matyaqubovning kumush medali va Rustamovaning to‘rtinchi o‘rinni egallaganidir: mamlakat uchun asosiy sport turi bo‘lgan og‘ir atletikada Turkmaniston raqobatbardoshligini saqlab qoldi, ammo buni yana bir bor oltin medalga aylantira olmadi.