«Qayrat» FK. «Qayrat» FK fotosurati
Olmaota shahrining «Qayrat» futbol klubi Yevropa Ligasining umumiy bosqichiga yo‘llanma ololmadi va yevrokuboklar mavsumini Konferensiyalar ligasida davom ettiradi.
Pley-off bosqichining javob uchrashuvida Qozog‘iston klubi safarda Belgiyaning «Anderlext» jamoasiga 0:3 hisobida mag‘lub bo‘ldi. Birinchi gol birinchi bo‘limga qo‘shib berilgan vaqtda penaltidan Mixaylo Svetkovich tomonidan urildi. Tanaffusdan so‘ng Daniil Sikan va Jyulen Byankon o‘z nomlarini tabloga yozdirdi.
Bir hafta avval Olmaotada o‘tkazilgan uchrashuvda ham «Anderlext» 3:0 hisobida g‘alaba qozongan edi. Shu tariqa, belgiyalik klub ikki o‘yin natijasiga ko‘ra 6:0 hisobida g‘olib chiqib, Yevropa Ligasining umumiy bosqichiga yo‘l oldi. «Qayrat» esa Konferensiyalar ligasining umumiy bosqichidan joy oldi.
Olmaotaliklar yevrokuboklar mavsumini Chempionlar ligasi saralash bosqichidan boshlagan edi. Birinchi raundda «Qayrat» Chernogoriyaning «Suteska» jamoasidan ikki uchrashuv natijasiga ko‘ra 4:1 hisobida ustun keldi. Ikkinchi raundda Qozog‘iston klubi Kiprning «Omoniya» jamoasiga qarshi maydonga tushdi: ikki o‘yinda ham 1:0 hisobidagi g‘alabalardan so‘ng olmaotaliklar penaltilar seriyasida 6:5 hisobida zafar quchdi.
Chempionlar ligasi saralashining uchinchi raundida «Qayrat» Bolgariyaning «Levski» klubiga har ikki uchrashuvda ham 0:1 hisobida mag‘lub bo‘ldi va Yevropa Ligasining pley-off bosqichiga yo‘l oldi. U yerda uning raqibi «Anderlext» bo‘ldi.
Konferensiyalar ligasining umumiy bosqichiga qur’a tashlashda «Qayrat» Belgiyaning «Sent-Tryuyden», Norvegiyaning «Brann», Shotlandiyaning «Xarts», Turkiyaning «Trabzonspor» va Ruminiyaning Krayova shahridagi «Universitatya» klublari bilan birga to‘rtinchi savatchadan joy oladi.
