Kannavaro javob beradi

Fabio Kannavaro. O‘zbekiston MOQ fotosurati

O‘zbekiston terma jamoasi bosh murabbiyi, italiyalik mutaxassis Fabio Kannavaro iyul oyi oxirida Italiyadan Toshkentga qaytadi va 2026 yilgi jahon chempionati yakunlari bo‘yicha katta matbuot anjumanida ishtirok etadi. Bu haqda jurnalist Nazrulla Saydulayev o‘zining Telegram-kanalida ma’lum qildi.

Italiyalik mutaxassis baribir avval rejalashtirganidan ertaroq ta’tilini to‘xtatishga majbur bo‘ldi. Jahon chempionatidagi ishtirokdan so‘ng Kannavaro jamoa bilan birga O‘zbekistonga qaytmadi, balki Nyu-Yorkdan to‘g‘ridan to‘g‘ri o‘z vataniga yo‘l oldi. U bu qarorini ikki oy davomida uzluksiz terma jamoa bilan ishlagani bilan izohlab, «Sentyabrda ko‘rishamiz» degandi.

Jamoa Toshkentga qaytgan paytida Kannavaroning yo‘qligi alohida tanqidlarga sabab bo‘ldi. Vitaliy Levchenko Eurasia Football nashriga bergan intervyusida bu holatni boshqaruvdagi xato sifatida baholadi. Uning fikricha, muvaffaqiyatsiz turnirdan so‘ng bosh murabbiy jamoaga qaytib, hisobot berishi va jahon chempionati davomida qabul qilingan qarorlarni tushuntirishi kerak edi.

Nashr qayd etishicha, Jahon chempionatida barcha o‘yinlarda mag‘lub bo‘lgan Iordaniya va Iroq terma jamoalarida ham tegishli xulosalar chiqarilgan hamda bosh murabbiylarning sport rahbariyati oldida hisobot berish jarayoni boshlangan. Endi shunday muhokama O‘zbekistonda ham o‘tkazilishi kutilmoqda.

O‘zbekiston terma jamoasi o‘z tarixidagi birinchi jahon chempionatini K guruhida oxirgi o‘rinda yakunladi. Jamoa Kolumbiyaga — 1:3, Portugaliyaga — 0:5 va DR Kongoga — 1:3 hisoblarida yutqazib, ochko to‘play olmadi va turnirni 2:11 to‘plar farqi bilan yakunladi.

Kannavaroga qaratilgan asosiy savollar jamoa himoyasini tashkil etish bilan bog‘liq bo‘ldi. O‘z davrining eng yaxshi himoyachilaridan biri va «Oltin to‘p» sohibi sifatida undan terma jamoaning o‘yinini ishonchliroq qilish kutilgan edi. Biroq, jamoa 11 ta gol o‘tkazib yubordi, pozitsion xatolarga yo‘l qo‘ydi, liniyalar orasida bo‘sh zonalar qoldirdi va markaziy himoyachilar uchun yetarli sug‘urta tizimini ta’minlay olmadi.

Shuningdek, tarkibdagi doimiy o‘zgarishlar va o‘yinni boshqarish ham tanqid qilindi. Turnir davomida Kannavaro qayd etilgan 26 futbolchidan 23 tasidan foydalandi. U bu rotatsiyani jarohatlar, ayrim o‘yinchilarning yetarli o‘yin amaliyotiga ega emasligi va kengroq tarkibga imkoniyat berish istagi bilan izohladi. U natija uchun mas’uliyatni tan oldi, biroq shtabning barcha qarorlarini xato deb hisoblamasligini ta’kidladi.

Italiyalik mutaxassisning tayinlanishi atrofidagi muhokamalar ham qaytadan faollashdi. Kannavaro 2025 yil oktyabrda terma jamoa bosh murabbiyi etib tayinlanib, jamoani jahon chempionatiga olib chiqqan Timur Kapadzeni almashtirgan edi. Valeriy Kechinov bunday almashinuvni bahsli qaror sifatida baholagan. Valeriy Nepomnyashiy esa yangi shtab futbolchilar imkoniyatlarini yetarlicha o‘rganishga ulgurmagani va jamoa tayyor bo‘lmagan taktik sxemalardan foydalanganini ta’kidlagan.

Azamat Abduraimov ham Kannavaroning tayinlanishi hozircha terma jamoaga sezilarli ustunlik bermaganini aytgan. Uning fikricha, murabbiy himoyadagi muammolarni hal qila olmagan, kadrlar tanlovida xatolarga yo‘l qo‘ygan va Kongo DR bilan o‘yinda vaziyatni o‘zgartirishga erisha olmagan. Shuningdek, u italiyalik murabbiy shtabida o‘zbek murabbiylarining yo‘qligini tanqid qilib, ular tajriba o‘rganishi mumkin bo‘lar edi, degan fikrni bildirgan.

Kannavaroning o‘zi natijalarni mamlakatning jahon chempionatida ilk bor ishtirok etishi bilan bog‘liq bosim, raqiblar darajasi va futbolchilarda tajriba yetishmasligi bilan izohladi. Uning ta’kidlashicha, o‘yinchilar qo‘llaridan kelgan barcha ishni qilgan va bu musobaqadan olingan saboq kelajakda terma jamoaga yordam beradi. U keyingi asosiy maqsad sifatida Osiyo Kubogini belgilaganini aytib, jamoa ushbu turnirga tayyorgarlikni sentyabr yig‘inidan boshlashi kerakligini bildirgan