O‘zbekiston futbol terma jamoasi sardori Eldor Shomurodovning Kongo DR termasi darvozasiga urgan goli 2026 yilgi jahon chempionati guruh bosqichida eng yaxshi gol deb tan olindi. Bu haqda FIFA matbuot xizmati xabar berdi.
G‘olib FIFA rasmiy saytida bolalar ovoz berishi natijalariga ko‘ra aniqlangan.
Shomurodov guruh K uchinchi turida Kongo DR termasiga qarshi o‘yinda gol urdi. Hujumchi o‘yinning 10-daqiqasidayoq o‘tkir burchakdan darvozabon ustidan to‘pni ustalik bilan oshirib, hisobni ochdi. Shunga qaramay, O‘zbekiston terma jamoasi 1:3 hisobida mag‘lub bo‘lib, turnirdagi ishtirokini yakunladi.
FIFA ma’lumotlariga ko‘ra, Shomurodovning goli 36% ovoz to‘plab, birinchi o‘rinni olgan. Ikkinchi o‘rinni Gaiti terma jamoasi futbolchisi Vilson Izidorning Marokash darvozasiga urgan goli egallagan, uchinchi o‘rin esa bosniyalik Kerim Alaybegovichning Qatarga qarshi o‘yindagi goliga nasib etgan. Nomzodlar orasida Leo Messi va Kilian Mbappe gollari ham bor edi.
O‘zbekiston terma jamoasi o‘z tarixida ilk bor jahon chempionati final bosqichida ishtirok etdi. Fabio Kannavaro boshchiligidagi jamoa guruh bosqichida barcha uch o‘yinda mag‘lub bo‘ldi: Kolumbiyaga — 1:3, Portugaliyaga — 0:5 va DR Kongoga — 1:3. O‘zbekiston terma jamoasi turnirni 2:11 to‘plar nisbati bilan yakunladi.
Eldor Shomurodov — Muborak shahridagi «Mash’al» maktabi tarbiyalanuvchisi. 2015 yilda u Toshkentning «Bunyodkor» klubiga o‘tgan. 2017 yilda «Rostov»ga taklif qilingan va u yerda barcha rasmiy turnirlarda 91 ta o‘yin o‘tkazib, 18 ta gol urgan. 2020 yil oktyabrda 7,5 million yevro kompensatsiya evaziga «Djenoa» klubiga o‘tgan. Genuya klubi safida A Seriyada 31 ta o‘yinda maydonga tushib, 8 ta gol urgan.
2021 yil avgust oyida «Roma» o‘zbek hujumchisi Eldor Shomurodovni 17,5 million yevro evaziga sotib oldi va u bilan 2026 yilgacha shartnoma imzoladi. Mavsum yakunlariga ko‘ra, rimliklar A Seriyada 6-o‘rinni egallagan. Shomurodov 28 ta o‘yinda maydonga tushgan, shularning 23 tasida zaxiradan o‘yinga qo‘shilgan. Uning hisobiga 3 ta gol va 4 ta golli uzatma yozilgan.
2023 yil yanvar oyida futbolchi «Spetsiya» klubiga ijaraga berildi va u yerda 15 ta o‘yin o‘tkazib, 1 ta gol urdi. Mavsum yakunlarida jamoa A Seriyadan tushib ketdi. Shu yil avgust oyida Eldor ijara asosida, keyinchalik sotib olish huquqi bilan 9 million yevro evaziga «Kalyari»ga o‘tdi. U yerda 22 ta o‘yinda 3 ta gol va 3 ta golli uzatma qayd etdi. 2024 yil yozida u yana «Roma»ga qaytdi va barcha musobaqalarda 37 ta o‘yinda ishtirok etib, 7 ta gol va 4 ta golli uzatma bilan yaxshi mavsum o‘tkazdi. 2025 yilda u Turkiyaning «Istanbul Bashakshehir» klubiga o‘tdi va 22 ta gol bilan Superliganing eng yaxshi to‘purari bo‘ldi. O‘zbekiston terma jamoasi safida Shomurodov 95 ta o‘yin o‘tkazib, 45 ta gol urdi.
