Jeymison Grir va Shavkat Mirziyoyev. O‘zbekiston prezidenti matbuot xizmati fotosurati
O‘zbekiston va Amerika Qo‘shma Shtatlari o‘zaro bozorlarga kirish imkoniyatlarini kengaytirish bo‘yicha kelishuvga erishdi. Shu munosabat bilan tomonlar tovarlar eksportida imtiyozli tarif rejimlarini joriy etadi. Bu haqda O‘zbekiston prezidentining Jahon savdo tashkiloti (JST) masalalari bo‘yicha maxsus vakili Azizbek Urunov LinkedIn sahifasida ma’lum qildi.
Urunov import-eksport bitimlari bo‘yicha o‘zaro tarif imtiyozlari kelishuvini Toshkentda bo‘lib o‘tgan muzokaralarning eng muhim amaliy natijasi deb atadi. Ushbu muzokaralarda O‘zbekiston prezidenti Shavkat Mirziyoyev va AQSHning savdo vakili Jeymison Grir ishtirok etdi.
Kelishuvlarga muvofiq, respublika hamkorlariga sanoat mahsulotlari va qishloq xo‘jaligi mahsulotlarining keng turlari uchun qulay tarif rejimini taqdim etadi. Bu esa mazkur tovarlarga nisbatan bojxona bojlarini kamaytirish yoki butunlay bekor qilishga olib keladi. Mulozimning so‘zlariga ko‘ra, AQSH ham o‘z navbatida o‘zbek tovarlariga nisbatan tarif choralarini qayta ko‘rib chiqish va amaldagi qonunchilikda belgilanganlardan tashqari qo‘shimcha bojlar joriy etmaslik majburiyatini oladi.
Urunovning qo‘shimcha qilishicha, tegishli hujjatlar to‘plami «dastlabki» xususiyatga ega. Erishilgan kelishuvlarni yakuniy rasmiylashtirish yaqin haftalar ichida yakunlanadi.
Shu bilan birga, O‘zbekiston prezidentining maxsus vakili ma’lum qilishicha, tomonlar ikki davlat manfaatlarini muvozanatlashtirish, Markaziy Osiyo respublikasining Jahon savdo tashkiloti (JST)ga a’zo bo‘lish jarayonini ilgari surish va yakunlash bo‘yicha qo‘shma sa’y-harakatlarni faollashtirish imkonini beruvchi keng qamrovli ramkaviy kelishuv yuzasidan muzokaralar o‘tkazish niyatida. Shuningdek, o‘zaro savdo va investitsiyalarni rag‘batlantirish bo‘yicha to‘liq formatdagi bitimni ishlab chiqish ishlari ham olib borilmoqda.
Ta’kidlash joiz, Toshkent va Vashington o‘rtasida Jahon savdo tashkiloti (JST) doirasidagi muzokaralar yakunlangani haqidagi rasmiy ikki tomonlama bayonnoma 2024 yil noyabr oyida imzolangan edi. Shundan so‘ng Amerika tomoni hujjatlarni adolatli savdo qoidalariga muvofiqligi nuqtayi nazaridan batafsil o‘rganishga kirishdi.
Ayni paytda O‘zbekistonning JSTga a’zo bo‘lish jarayoni yakuniy bosqichda turibdi. Rejaga ko‘ra, ushbu jarayon joriy yilning o‘zida yakunlanishi kutilmoqda.
So‘nggi vaqtlarda O‘zbekiston va AQSH o‘rtasidagi iqtisodiy aloqalar sezilarli darajada mustahkamlanmoqda. Xususan, avvalroq ikki davlat rahbarlari — Shavkat Mirziyoyev va Donald Tramp 32 milliard dollarlik shartnomalar imzolanganini ma’lum qilgan edilar. Ular qatorida Toshkentning 8,5 milliard dollarlik Boeing samolyotlarini xarid qilishi ham bor.
Bundan tashqari, AQSH muhim strategik minerallarni qazib olish sohasiga investitsiya kiritishni rejalashtirmoqda. Jumladan, Orion korporatsiyasi boshqa kompaniyalar bilan konsorsium tarkibida Markaziy Osiyodagi loyihalarni qamrab oluvchi 20 milliard dollarlik global investitsiya portfelini shakllantirish imkoniyatini ko‘rib chiqmoqda. Tabiiy resurslarga ega, zamonaviy texnologiyalar va investitsiyalarga ehtiyoj sezayotgan O‘zbekiston mazkur tashabbus uchun tabiiy hamkor sifatida baholanmoqda.
Shuningdek, AQSHning Traxys kompaniyasi ham O‘zbekistonning mineral resurslariga qiziqish bildirmoqda. Kompaniya respublikani o‘zining eng ustuvor va strategik ahamiyatga ega hamkorlaridan biri sifatida baholamoqda.
