gov.kz fotosurati
Rossiyaning «Kommersant'» nashri bugun Reuters agentligiga tayanib xabar berishicha, 26 may kuni Qozog'istonning Tengiz konida navbatdagi avariya yuz bergan. Hodisa neft qazib olishning keskin pasayishiga olib kelgan: avvalgi 125 000 tonna o'rniga, kon hozirda atigi 5000 dan 10 000 tonnagacha neft qazib olmoqda.
Soha manbalarining hisob-kitoblariga ko'ra, ishlab chiqarishni tiklash uchun taxminan bir hafta kerak bo'ladi. Avariya, shuningdek, Qozog'istonning asosiy eksport yo'nalishi bo'lgan Kaspiy quvur konsortsiumi (QQK) orqali neft yetkazib berishning kamayishiga olib kelgan.
Qozog'iston nashrlari ham ishlab chiqarish 90% ga kamayganini xabar qilishdi. Shu bilan birga, kon operatori «Tengizshevroyl» matbuot xizmati 28 may kuni ob'ektlardan birida «kichik operatsion nosozlik» yuz berganini xabar qildi.
Bu Tengiz uchun 2026 yilda sodir bo'lgan uchinchi jiddiy hodisa. 18 yanvar kuni kondagi GTES-4 elektr stantsiyasidagi transformatorlar yong'inga uchradi va ishlab chiqarish deyarli bir oyga to'xtatildi. 11 mart kuni yana bir hodisa sodir yuz berdi — kaustik neytrallash qurilmasida yong'in, garchi ishlab chiqarish saqlanib qolgan bo'lsa ham.
2026 yil birinchi choragi natijalariga ko'ra, Tengizdagi ishlab chiqarish o'tgan yilning shu davriga nisbatan 60% ga kamaygan va Qozog'iston byudjetiga yetkazilgan zarar taxminan 900 million dollarga baholanmoqda.
Tengiz «Tengizshevroyl» konsortsiumi tomonidan boshqariladi, unda aksariyat ulushlar Amerikaning Chevron (50%) va ExxonMobil (25%), shuningdek, Qozog'istonning «KazMunayGaz» (20%) kompaniyalariga tegishli.
