Shimoliy Makedoniya-Qozog‘iston o‘yinidan lavha. QFF matbuot xizmati fotosurati
Jahon chempionati saralash bosqichining yettinchi turidan so‘ng futbol bo‘yicha Qozog‘iston terma jamoasi jahon chempionatiga yo‘llanma olish uchun hatto nazariy imkoniyatini ham yo‘qotdi.
Qozog‘istonliklar Lixtenshteynga qarshi ikkita o‘yin o‘tkazib, olti ochko bilan yettinchi turga kirishdi. Jahon chempionati yo‘llanmasi uchun kurashni davom ettirish imkonini beradigan guruhda ikkinchi o‘rinni qo‘lga kiritish uchun Qozog‘iston qolgan ikkita o‘yinda g‘alaba qozonishi kerak edi – safarda Shimoliy Makedoniya bilan va uyda esa Belgiya bilan. Shuningdek, qozoqlar Shimoliy Makedoniya va Belgiya Uelsga yutqazishini, bundan tashqari belgiyaliklar Lixtenshteynga ham mag‘lub bo‘lishini kutishlari kerak edi.
Voqealarning bunday rivoji ehtimoli juda past edi, shuning uchun ular boshidanoq amalga oshmagani tabiiy: Qozog‘iston 13 oktyabr kuni safarda Shimoliy Makedoniya bilan 1:1 hisobida durang o‘ynagan bo‘lsa, Belgiya Uelsni 3:1 hisobida mag‘lub etgandi.
Boshqa vaziyatda qozog‘istonliklar safarda makedoniyaliklar bilan durang o‘ynasa ayni muddao bo‘lardi. Qozog‘iston o‘yinchilari ishonchli ko‘rinishdi, ko‘p hujum qilishdi va hisobni ochishdi: 54-daqiqada Dinmuhamed Karaman tepadan tepib qozog‘istonliklarni hisobda oldinga olib chiqdi. Biroq, hisobdagi ustunlik uzoqqa cho‘zilmadi — oradan 20 daqiqa o‘tib Enis Bardi hisobni tenglashtirdi.
Yettinchi turdan so‘ng guruhdagi vaziyat quyidagicha: Belgiya (6 o‘yin) — 14 ochko, Shimoliy Makedoniya (7 o‘yin) — 13 ochko, Uels (6 o‘yin) — 10 ochko, Qozog‘iston (7 o‘yin) — 7 ochko, Lixtenshteyn (7 o‘yin) — 0.
15 noyabr kuni bo‘lib o‘tadigan so‘nggi turda Qozog‘iston Belgiyani qabul qiladi.
