«Qayrat»-«Real» o‘yinidan lavha. Sputnik fotosurati
Olmaotaning «Qayrat» futbol klubi UEFA Chempionlar ligasi guruh bosqichining 2-turida «Real»ni qabul qilib, 5:0 hisobida mag‘lub bo‘ldi.
«Qayrat» jahonning buyuk futbol klublaridan biriga qarshi tura olishiga kamdan kam odam shubha qilardi. Ammo «qirollik klubi»ning Qozog‘istonga tashrifi mamlakat uchun katta voqea va haqiqiy bayramga aylandi. Mehmonxonada mehmonlarni kutib olish uchun yuzlab qozog‘istonlik ishqibozlar kelishdi va o‘yinga chiptalar bir zumda sotilib ketdi, bundan vijdonsiz chipta sotuvchilar va qalbaki chiptalarni sotuvchi turli firibgarlar foydalanib qoldi. Haqiqiy chiptaga ega bo‘lgan ba’zi muxlislar tribunaga kira olmaganlar. Oqibatda stadionga kiraverishda ur-sur yuzaga kelgan va xavfsizlik xodimlari turniketlarni yopishga majbur bo‘lgan.
«Real» futbolchilari jangovor tarkibda maydonga tushishdi, jumladan, ularning orasida dunyoning eng yaxshi futbolchilaridan biri, uchrashuv qahramoniga aylangan Kilian Mbappe bor edi.
«Qayrat» birinchi bo‘limda qo‘lidan kelganicha qarshi turdi va faqat bir marta Mbappe tomonidan belgilangan penaltini o‘tkazib yubordi. Ammo ikkinchi bo‘limda raqiblar tezlikni oshirib, olmaotalik yosh darvozabon Sherxon Kalmurza darvozasiga yana to‘rtta gol kiritishdi. Mbappe xet-trik qayd etgan bo‘lsa, o‘yin oxirida Eduardo Kamavinga va Braim Dias ham gol urishdi.
Bu «Qayrat»ning Chempionlar ligasidagi ikki o‘yindagi ikkinchi mag‘lubiyati bo‘ldi. Birinchi turda Portugaliyaning «Sporting» klubi mehmoni bo‘lib, 4:1 hisobida mag‘lub bo‘lgandi. Uchinchi turda 21 oktyabr kuni «Qayrat» o‘z maydonida Kiprning «Pafos» jamoasiga qarshi bahs olib boradi.
