Tasvir neyrotarmoq yordamida olindi
Turkiyaning DİLAHAN TURİZM kompaniyasi «Andijon» futbol klubi Antaliyada o‘tkazilgan uchta o‘quv-mashg‘ulot yig‘inini uchun unga 69,9 ming yevro qarzdor ekanini ma’lum qildi. Tegishli xat nusxasi «Farg‘ona» tahririyatiga kelib tushgan.
Hujjat 2026 yil 2 iyun sanasi bilan rasmiylashtirilgan bo‘lib, u Andijon Viloyat PFK MCHJ bosh direktori Ziyod Mashrapovga yo‘llangan. Xatga DİLAHAN TURİZM direktori Rejep Shamil Yashajan imzo chekkan.
Turkiya kompaniyasi ma’lum qilishicha, u 2026 yil mavsumi boshlanishidan oldin «Andijon» uchun uchta qishki o‘quv-mashg‘ulot yig‘inini tashkil etgan.
Birinchi yig‘in 7 yanvardan 21 yanvargacha Belekdagi besh yulduzli Papillon Belvil mehmonxonasida bo‘lib o‘tgan. Uning qiymati 90 334 yevroni tashkil etgan.
Ikkinchi yig‘in 24 yanvardan 5 fevralgacha Susesi Luxury Resort mehmonxonasida o‘tkazilgan va 89 588 yevroni tashkil qilgan.
Tayyorgarlikning uchinchi bosqichi 5 fevraldan 18 fevralgacha Calista Luxury Resortda bo‘lib o‘tgan. Ushbu xizmat uchun klubga 100 219 yevrolik hisob taqdim etilgan.
Xizmatlarning umumiy qiymati 280 141 yevroni tashkil etgan. DİLAHAN TURİZM ma’lumotlariga ko‘ra, «Andijon» klubi 210 219 yevro to‘lagan, qolgan qarz esa 69 922 yevroga yetgan.
Turkiya kompaniyasi shartnomalarda ko‘zda tutilgan to‘lov muddatlari tugaganini ma’lum qiladi. U qarzni to‘rt kun ichida to‘lash hamda mablag‘ o‘tkazish muddatlari ko‘rsatilgan kafolat xatini yuborishni talab qilgan.
Agar to‘lov amalga oshirilmasa, DİLAHAN TURİZM sudga murojaat qilish va klubdan kechiktirilgan to‘lov uchun foizlar, sud xarajatlari hamda yuridik xizmat xarajatlarini undirishini bildirgan. Xatda shuningdek, qarz o‘z vaqtida qoplanmagani sababli kompaniya mehmonxonalarga to‘lovlar qilishda, shuningdek soliq va boshqa moliyaviy majburiyatlarni bajarishda qiyinchiliklarga duch kelayotgani qayd etilgan.
«Farg‘ona» tahririyati «Andijon» futbol klubiga o‘z pozitsiyasini bayon qilish imkoniyatini taqdim etishga tayyor. Klub vakillari o‘z izohlarini bosh muharrir Daniil Kislovga elektron pochta orqali dan.kislov@gmail.com manziliga yuborishlari va shu bilan birga tahririyatning ferghananews@gmail.com pochtasiga ham yo‘llashlari mumkin.
