cpc.ru sayti fotosurati
Qozog‘iston Majilisi (parlament quyi palatasi) deputati Aydos Sarim Bosh prokuror va Axborot vaziriga ijtimoiy tarmoqlarda Kaspiy quvurlari konsorsiumi (KQK) terminaliga uyushtirilgan hujumlarni qo‘llab-quvvatlagan fuqarolarni javobgarlikka tortish talabi bilan murojaat qildi, deb yozadi Kursiv.kz.
Gap qozog‘istonliklar ochiqdan-ochiq «davlat uchun muhim bo‘lgan ushbu infratuzilmaga hujumlarni ma’qullagan va qo‘llab-quvvatlagan» postlar haqida ketmoqda. «Bunday harakatlar so‘z erkinligiga oid konstitutsiyaviy huquqdan aniq chetga chiqadi va milliy manfaatlarga bevosita zarar yetkazadi», — deb hisoblaydi parlament a’zosi.
Deputat Bosh prokuraturadan bunday nashrlarga huquqiy baho berishni va ularni terrorizmni targ‘ib qilish (Qozog‘iston Respublikasi Jinoyat kodeksining 256-moddasi) yoki davlatga xiyonat (Qozog‘iston Respublikasi Jinoyat kodeksining 175-moddasi) deb hisoblashni so‘raydi. Vlast.kz nashrining aniqlik kiritishicha, Oydos Sarim 17 dekabr kuni bo‘lib o‘tgan yalpi majlisda butun Amanat fraksiyasi nomidan tegishli so‘rovni o‘qib eshittirgan.
U fraksiya nomidan, shuningdek, «Qozog‘iston Respublikasining iqtisodiy xavfsizligini ta’minlash uchun muhim bo‘lgan neft quvurlari va boshqa infratuzilma obyektlarini yo‘q qilishga chaqiriqlarni o‘z ichiga olgan ommaviy axborotni tarqatishga yo‘l qo‘yilmasligiga oid aholi o‘rtasida keng tushuntirish ishlarini» tashkil etishga chaqirdi.
Noyabr oyi oxirida Kaspiy quvurlari konsorsiumining Novorossiyskdagi terminaliga Ukraina dronlarining hujumi natijasida №2 chidamli langar uskunasi (CHLU) ishdan chiqdi. Hozir terminalda joylashgan uchta CHLUdan faqat bittasi ishlamoqda (№3 CHLUga noyabr oyining o‘rtalaridan buyon texnik xizmat ko‘rsatilmoqda), bu esa uning «neftni haydab o‘tkazish qobiliyatini sezilarli darajada pasayishiga olib keldi».
«Neft tashish hajmining qisqarishi mamlakat uchun katta iqtisodiy xavf va yo‘qotishlarni keltirib chiqaradi. KQK orqali keladigan yillik eksport tushumi qariyb 30 milliard dollarni tashkil etadi, uning uchdan bir qismi Qozog‘iston Milliy jamg‘armasiga tushadi va mamlakat soliq tushumlarining qariyb 20 foizini tashkil etadi. Ekspert hisob-kitoblarga ko‘ra, ishlarning uzoq muddat to‘xtab qolishi vaqtidagi mumkin bo‘lgan oylik yo‘qotishlar 500 million dollarga yetishi mumkin», — deydi Aydos Sarim.
Avvalroq, Qozog‘iston Energetika vazirligi Kaspiy quvurlari konsorsiumiga qilingan hujumlar respublikada neft qazib olishda 480 ming tonna yo‘qotishlarga olib kelganini ma’lum qilgandi. Endi rasmiylar neft qazib olishni kamaytirmaslik uchun eksportning muqobil yo‘llarini faol izlashmoqda.
