Baktiyar Orozov. economist.kg sayti fotosurati
Qirg‘iziston prezidenti Sadir Japarov Fan, oliy ta’lim va innovatsiya vaziri Baktiyar Orozovni (Ta’lim va fan vazirligi) lavozimidan ozod qildi. Mulozim «davlat va munitsipal xodimlarining axloqiy talablariga rioya qilmagani» uchun ishdan bo‘shatilgan, deyiladi prezident saytida.
Japarov matbuot xizmatining xabar berishicha, prezident 15 dekabr kuni Ta’lim va fan vazirini lavozimidan bo‘shatish to‘g‘risidagi farmonni imzolagan. Bu boradagi xabarda davlat rahbari nazarda tutgan huquqiy hujjatlar sanab o‘tilgan.
Ushbu qarorning sabablari haqida qo‘shimcha ma’lumot berilmagan.
Joriy yil may oyida Qirg‘iziston prezidenti Ta’lim va fan vazirligi hamda Intellektual mulk va innovatsiyalar davlat agentligi negizida ikkita mustaqil idora: Maorif vazirligi va Fan, oliy ta’lim va innovatsiya vazirligini tashkil etish to‘g‘risidagi farmonni imzolagani haqida xabar berilgan edi.
Ta’kidlanishicha, islohotlar fan va ta’lim sohasida integratsiyalashgan va natijaga yo‘naltirilgan davlat boshqaruvi tizimini yaratish, shuningdek, ushbu sohada ma’muriy samaradorlikni oshirish va yosh olimlarning tadqiqot va innovatsiyalarda ishtirok etishi imkoniyatlarini kengaytirish maqsadida amalga oshirilgan.
Shuningdek, o‘shanda Japarov yangi vazirliklar rahbarlari vazifasini bajaruvchi lavozimlarni tayinlagani haqida xabar berilgandi. Dogdurkul Kendirboyeva Maorif vazirligi rahbari vazifasini bajaruvchi lavozimiga, Baktiyar Orozov esa Fan, oliy ta’lim va innovatsiya vaziri vazifasini bajaruvchi lavozimiga tayinlangandi. Ularning nomzodlarini keyinchalik respublika parlamenti tasdiqladi.
Ushbu tayinlovga qadar Orozov Adliya vaziri o‘rinbosari va Ta’lim va fan vaziri o‘rinbosari lavozimlarida ishlagan.
