O‘zbekiston Energetika vazirligi. yuz.uz sayti fotosurati
O‘zbekiston Energetika vaziri Jo‘rabek Mirzamahmudov mamlakat energetika tizimi oktyabr oyidan kuz-qish mavsumiga o‘tganini va shuning uchun vazirlik va tizim korxonalarida 24/7 rejimida navbatchiliklar tashkil etilganini ma’lum qildi. «Gazeta.uz» rasmiy so‘zlarini keltiradi.
Vazir elektr ta’minoti bo‘yicha «1154» raqami va gaz ta’minoti bo‘yicha «1104» raqami orqali «koll markaz»lari ishlab turganini qo‘shimcha qildi.
Mirzamahmudov so‘nggi besh yil ichida mamlakatda favqulodda uzilishlar soni 50 foizga, 7834 tadan 4125 tagacha kamayganini ta’kidladi. Bundan tashqari, nosozlikni bartaraf etishning o‘rtacha vaqti 8-10 soatdan 1,5-2 soatgacha kamaygan.
«Avariyalar bo‘lmasligi kerak. Biroq, agar tarmoqning o‘tmishdagi va modernizatsiya uchun ajratilgan mablag‘lardan oldingi holatini taqqoslasak, eskirish darajasi 50−60 foizni tashkil etgan. Bugungi kunda bu ko‘rsatkich 35−40 foizni tashkil etadi»— dedi vazir.
Shuningdek, u avariyani bartaraf etish uchun hududlarda jami 908 ta transformator, 538 tonna transformator moyi, 546 km kabel, 95 tonna sim, 4,1 ming ta tayanch hamda 88 mingta ehtiyot qismlar (izolator va ajratkich) hamda muftalar zaxirasi yaratilib, 6 505 tadan ortiq xodimdan iborat jami 1201 ta brigada va ularga xizmat ko‘rsatuvchi 905 ta avtomashina hamda 370 ta maxsus texnikalar shay holatga keltirilganini ta’kidladi.
Kuz-qish mavsumiga tayyorgarlik ko‘rish doirasida 7455 km elektr uzatish liniyalari va 1748 ta transformator stansiyalari modernizatsiya qilindi, bu 954 ta mahalladagi 800 mingdan ortiq xonadonlarning elektr ta’minotini yaxshiladi.
Vazir ta’kidlashicha, o‘tgan yili 81,5 milliard kVt/soat elektr energiyasi ishlab chiqarilgan. Joriy yil oxiriga kelib 85,5 milliard kilovatt-soat elektr energiyasi ishlab chiqarilishi kutilmoqda. Bundan tashqari, prognozlarga ko‘ra, isitish mavsumida umumiy iste’mol 47 milliard kVt/soatga yetadi (kuniga o‘rtacha 257 million kVt/soat).
Gaz ta’minotida 2025 yil boshidan 512,7 ming tonna suyultirilgan gaz yetkazib berilgan. Shuningdek, yil yakuniga qadar yana 142,4 ming tonna suyultirilgan gaz yetkazib berilishi kutilmoqda. Bundan tashqari, respublikaning barcha hududlarida suyultirilgan gaz yetkazib berish uchun qo‘shimcha 29 mingdan ortiq maishiy gaz ballonlari zaxirasi yaratilgan.
Suyultirilgan gaz ta’minoti bosqichma-bosqich to‘liq raqamlashtirish ko‘zda tutilgan. Iste’molchilarga maishiy gaz ballonlarni manzilli yetkazib berishda shaffoflikni ta’minlash hamda korrupsion holatlarni oldini olish maqsadida yangi Face ID tizimi (dastlab Andijon viloyati) ishga tushirilgani qayd etildi. Mazkur tizim orqali suyultirilgan gaz iste’molchilarining ma’lumotlari bazasi shakllantirilmoqda.
Kuz-qish davri uchun iste’molchilarga jami 10 mln tonna mahalliy va 2 mln tonna import ko‘mir ko‘mir yetkazib berish rejalashtirilgan. Omborlarda ushbu yoqilg‘ining 724 ming tonna zaxirasi to‘plangan. Benzinga talab keskin oshsa, 65 ming tonna avtomobil yoqilg‘isi zaxirasi mavjud.
Mirzamahmudovning so‘zlariga ko‘ra, vazirlik resurslarni tejash ustida ishlamoqda. Xususan, 2025 yilga mo‘ljallangan maqsad 6 milliard kVt/soat elektr energiyasi va 4,4 milliard kubometr gazni tejashdan iborat.
Vazir ijtimoiy qo‘llab-quvvatlash mavzusiga to‘xtalib, noyabr oyida «Yagona ijtimoiy ta’minot» reyestriga kiritilgan oilalar isitish mavsumida yashash sharoitlarini yaxshilash uchun davlatdan 1 million so‘m (83 dollar) miqdorida bir martalik moliyaviy yordam olishlarini eslatdi.
Shuningdek, rasmiy, ayniqsa gazlashtirilmagan hududlarda elektr energiyasi uchun qo‘shimcha chegirmalar joriy etish ko‘rib chiqilayotganini ta’kidladi, ammo u ushbu tizim qachon kuchga kirishi haqida aniq ma’lumot bermadi. Biroq, Mirzamahmudov kommunal xizmatlar tariflari kelasi yilning may oyida oshishini aytdi. Indeksatsiya inflyatsiyaga mos ravishda amalga oshiriladi, deya xulosa qildi energetika vaziri.
