Premer-liga matbuot xizmati fotosurati
2026 yilgi mavsumda Qirg‘iziston oliy futbol ligasidagi jamoalar soni 14 tadan 16 taga ko‘payadi. Bu haqdagi qaror Qirg‘iziston futbol ittifoqi ijroiya qo‘mitasi yig‘ilishida qabul qilindi, deb xabar beradi QFI matbuot xizmati.
Klublar sonini kengaytirish uchun futbol chempionati reglamentiga jiddiy o‘zgartirishlar kiritildi. Xususan, Premer-liganing joriy mavsumida oxirgi o‘rinni egallagan jamoani quyi ligaga tushirish qoidasi, shuningdek, Premer-ligada ikkinchi o‘rinni egallagan jamoa va Milliy ligada (ikkinchi divizion) ikkinchi kuchli jamoa o‘rtasida o‘tkazilishi kerak bo‘lgan pley-off o‘yini qoidasi bekor qilindi.
Biroq, bu mavsumda ko‘tarilish borasida gap borishi mumkin emas, chunki Milliy ligadagi jamoalar litsenziyaga ega emas va shuning uchun Premer-ligaga kiritilmaydi. Shu bois, turnirni tashkil etishning yangi tartibini tasdiqlashga qaror qilindi.
Litsenziyalash talablariga javob beradigan va Oliy ligada ishtirok etish istagini bildirgan Milliy liga klublari o‘rtasidagi mini-turnir g‘olibiga bitta o‘rin beriladi. Ikkinchi o‘rin Norin, Botken yoki Talas viloyatlarining oliy ligada ishtirok etmagan klublariga nasib etadi. Agar shunday jamoalar bir nechta bo‘lsa, ular pley-off o‘yinlarida ishtirok etadilar. Shu tariqa mamlakat futbol rahbariyati liga geografiyasini sun’iy ravishda kengaytirmoqda.
Eslatib o‘tamiz, 2025 yilgi mavsum boshlanishidan oldin klublar soni 10 tadan 14 taga ko‘paytirilgan edi. Ushbu qarordan bir necha oy oldin tashkil etilgan to‘rtta mutlaqo yangi klublar ham e’lon qilingan edi: «Aziagol» (Bishkek), «Bishkek Siti», «Bars» (Qorako‘l) va «O‘zgan». Ayrim klublarda hamon infratuzilma yo‘q. «Aziagol» va «Bishkek Siti» turnir jadvalining quyi pog‘onasida joylashgan. Kelgusi mavsumda investorlarning ushbu jamoalarga qiziqishi saqlanib qoladimi, yo‘qmi — bu noma’lum.
