Aydos Sarim. Nur.kz sayti fotosurati
Qozog‘iston Rossiya va Ukraina o‘rtasidagi muzokaralar maydoniga aylanishga tayyor. Bu haqda parlament quyi palatasi deputati, xalqaro ishlar, mudofaa va xavfsizlik bo‘yicha parlament qo‘mitasi raisi o‘rinbosari Aydos Sarim RTVI telekanaliga bergan intervyusida ma’lum qildi.
«Vositachilik va moderatsiyaga kelsak, agar Qozog‘istonning vositachi bo‘lib, biror narsani hal qilishda yordam berish imkoniyati va zarurati bo‘lsa, ha, men biz uchun shunday rolni ko‘raman. Bu Rossiya-Ukraina mojarosiga ham taalluqli bo‘lishi mumkin. Men umuman jarayon haqida gapirmayapman, albatta, lekin muayyan ishlarni hal qilishda — nega endi bunday bo‘lmasligi kerak? Axir, muzokaralar turli darajadagi masalalarni hal qiluvchi turli maydonlarda olib boriladi. Tabiiyki, bularning barchasi tomonlarning muzokara qilish istagi paydo bo‘lgandagina sodir bo‘lishi mumkin», — dedi deputat.
Sarim shaxsan o‘zi «buni orzu qilishini» tan oldi.
«Bu, ular aytganidek, Qozog‘iston uchun yuksak nuqta bo‘lardi. Qon to‘kilishini to‘xtatish... bu, ehtimol, boshqa narsalar qatori, prezidentning diplomatik faoliyatidagi yuksak cho‘qqi bo‘lardi: Ostonada barcha faol o‘yinchilarni to‘plash va bu jarayonning bir qismiga aylanish», — dedi u va «tinchlashtirish jarayoni»ning o‘zi o‘nlab yillar davom etishi mumkinligini qo‘shimcha qildi.
Jurnalistning Qozog‘istonda muzokaralar o‘tkazish uchun old shartlar bormi, degan savoliga deputat shunday javob berdi: «Biz allaqachon Trampdan (AQSH prezidenti Donald Tramp – tahr.izohi) shunday signalni ko‘rdik – u tez orada mintaqamizga tashrif buyurishni rejalashtirmoqda. Holbuki, Qozog‘iston halol broker va vositachi ekan, nega bunday bo‘lmasligi kerak?».
«Va bundan ham muhimi: Qozog‘iston Rossiya prezidenti Vladimir Putin uchun ham, Tramp uchun ham qulay mamlakat; biz ularning xavfsizligini va boshqa narsalarni ta’minlashga to‘liq qodirmiz», — deya xulosa qiladi Aydos.
Yanvar oyi boshida Qozog‘iston prezidenti Qosim-Jomart To‘qayev «Ana tіlі» gazetasiga bergan intervyusida Donald Tramp bilan telefon suhbatida Ukrainadagi vaziyatni muhokama qilganini ma’lum qildi. U Ostonaning Ukraina bo‘yicha muzokaralar boshlanishini qo‘llab-quvvatlashini yana bir bor ta’kidlab, mamlakat vositachilik so‘ramayotganini va xalqaro maydonda «Qozog‘iston salohiyati va imkoniyatlaridan kelib chiqib» harakat qilayotganini ta’kidladi. To‘qayev, shuningdek, respublika «xalqaro muammolarni hal qilishda yordam berishga doim tayyor»ligini ta’kidladi.
Avvalroq Qozog‘iston rasmiylari Moskva va Kiyev o‘rtasidagi muzokaralar uchun o‘z hududini bir necha bor taklif qilgan. Bu fikrni boshqalar qatori sobiq Tashqi ishlar vaziri Muxtor Tileuberdi ham ta’kidlagan. Qozog‘istonning sobiq prezidenti Nursulton Nazarboyev ham Vladimir Putin va Ukraina prezidenti Vladimir Zelenskiy o‘rtasidagi uchrashuvni Qozog‘istonda tashkil etishni taklif qilgan.
