YETB matbuot xizmati fotosurati
Yevroosiyo taraqqiyot banki (YETB) va Turkiyaning Orta Asya Investment Holding kompaniyasi Qirg‘izistonda GES qurilishi bo‘yicha hamkorlik shartnomasini imzoladi. Bu haqda xalqaro moliya instituti matbuot xizmati xabar berdi.
Tomonlar Suusamir-Kokomeren GES kaskadi loyihasining texnik-iqtisodiy asoslarini birgalikda tayyorlashga kelishib oldilar. YETB ushbu hujjatni ishlab chiqishni moliyalashtiradi.
Ta’kidlanishicha, Orta Asya Investment Holding Qirg‘izistonda ikkita yirik GES majmuasini — yuqorida aytib o‘tilgan majmuaga qo‘shimcha ravishda Qozarman GES kaskadini qurish niyatida. Loyihalar kompaniya va Markaziy Osiyo respublikasi Energetika vazirligi o‘rtasida tuzilgan investitsiya shartnomasi asosida amalga oshirilmoqda. Ularning amalga oshirilishi ham mamlakat, ham butun mintaqa uchun muhim strategik, iqtisodiy va ijtimoiy ahamiyatga ega, deya qayd etdi YETB.
Bank ma’lumotlariga ko‘ra, ushbu loyihalarni amalga oshirishga yo‘naltirilgan jami sarmoya hajmi 6 milliard dollardan oshadi. Mutaxassislarning prognozlariga ko‘ra, yangi obyektlar qurilishi Qirg‘iziston energetika tizimining o‘rnatilgan quvvatini 50 foizdan ko‘proqqa oshiradi. Bu mamlakatning o‘sib borayotgan ichki talabini qondirishni ta’minlaydi, shuningdek, resurslar eksportini ko‘paytirish uchun imkoniyatlar yaratadi.
YETB turk xoldingining Qirg‘izistondagi tashabbuslarini qo‘llab-quvvatlagan birinchi xalqaro moliya institutlaridan biri bo‘lgani ta’kidlandi. Bundan tashqari, Suusamir-Kokomeren GES kaskadi loyihasi Yevroosiyo taraqqiyot bankining «Markaziy Osiyo suv-energetika majmuasi» sarmoyaviy dasturining bir qismidir.
Orta Asya Investment Holding kompaniyasi va Qirg‘iziston Energetika vazirligi o‘rtasida investitsiya shartnomasi imzolangani joriy yilning avgust oyida e’lon qilingan edi. O‘shanda turk kompaniyasi loyihaga 10 milliard dollar sarmoya kiritishga tayyorligi aniqlangan edi. Ishbilarmonlar GES qurilishidan tashqari, Markaziy Osiyo respublikasida bir qator ijtimoiy tashabbuslarni amalga oshirish, jumladan, yetim bolalarga yordam berish, tibbiyot muassasasi ochish, energetika sohasida mutaxassislar tayyorlashni rejalashtirgan.
